PEPILECTURAS PARA ADULTOS VOLVE ESTE CURSO!

 Un ano máis, desde BiblioPepiño poñemos en marcha o noso Club de Lectura Pepilecturas para adultos, un espazo para compartir lecturas, opinións, recomendacións e, sobre todo, bos momentos arredor dos libros.

O club está aberto a todos os membros da comunidade educativa: familias, profesorado e demais persoas vinculadas ao centro que teñan ganas de ler e participar.

A inscrición realizarase a través do seguinte formulario:

 É importante ter en conta que os libros propostos ao longo do curso deberán ser adquiridos polas propias persoas participantes.

Non é necesario ser un gran lector nin ter experiencia en clubs de lectura. Só fan falta ganas de descubrir novas historias, compartir impresións e gozar da lectura en compañía.

Pepiño xa está preparando novas lecturas… só faltades vós!

Anímate a participar en Pepilecturas para adultos e forma parte desta pequena comunidade lectora.

VOLVE PEPILECTURAS!!!

 Un novo curso, unha nova aventura entre libros!

Este ano o noso Club de Lectura Pepilecturas estará aberto ao alumnado de 3º, 4º, 5º e 6º de Educación Primaria que teña ganas de compartir lecturas, descubrir novas historias, conversar sobre libros e pasar bos momentos arredor da lectura.

Maña, venres 11 de setembro, o alumnado levará para a casa a folla de inscrición.

Para participar, deberá devolvela antes do mércores 16 de setembro, debidamente cuberta e asinada.

É importante entregar tamén asinada a autorización de uso de voz e imaxe, xa que ao longo do curso poderemos realizar diferentes actividades relacionadas coa biblioteca, a radio e o noso blog.

Se che gusta ler, compartir, opinar e descubrir novas historias…

Pepiño está agardando por ti!

Anímate e únete a Pepilecturas!

RECOMENDACIÓNS DE VERÁN

O curso remata, chegan as vacacións e con elas un tempo perfecto para descansar, xogar, pasear, compartir momentos en familia… e, por suposto, seguir lendo.

Dende BiblioPepiño queremos convidar a todo o alumnado a levar a lectura na maleta este verán. Un libro pode acompañarnos á praia, ao parque, á montaña, á aldea ou mesmo a ese recuncho tranquilo da casa no que tanto nos gusta estar.

Por iso preparamos unha selección de recomendacións lectoras para o verán, pensadas para diferentes idades, gustos e momentos. 

Ler no verán non ten que ser unha obriga, senón unha oportunidade para gozar. Cada lector e cada lectora pode escoller o seu ritmo, o seu momento e o seu libro. O importante é manter viva a curiosidade e deixar que as historias nos acompañen tamén durante as vacacións.

Dende a biblioteca animámosvos a:

• Escoller libros que vos apetezan de verdade
• Ler un pouquiño cada día ou cando o corpo o pida
• Compartir lecturas en voz alta coa familia
• Visitar bibliotecas públicas durante o verán
• Recomendar a outras persoas aqueles libros que vos gusten especialmente.

Agardamos que estas recomendacións vos axuden a descubrir novas historias e a vivir un verán cheo de imaxinación, aventuras e palabras bonitas.

PICNIC LITERARIO

 As nosas Pepilecturas de alumnado despediron o curso cunha xornada de convivencia moi especial no Parque de Pías, un espazo perfecto para compartir lectura, xogos e bos momentos ao aire libre.

Durante a tarde realizamos diferentes actividades arredor dos libros que nos acompañaron ao longo do club de lectura. Primeiro, debuxamos e decoramos un cartel con aqueles títulos que máis nos gustaron, deixando constancia das historias que máis nos fixeron rir, pensar, emocionarnos ou imaxinar.

Tamén elaboramos un ranking lector, no que cada participante puido valorar as súas lecturas favoritas e compartir cos demais os motivos da súa elección. Foi moi bonito escoitar as opinións do alumnado e comprobar como cada libro deixa unha pegada diferente en cada lector e lectora.

Un dos momentos máis divertidos chegou cando imitamos as portadas das nosas lecturas favoritas. Con moita creatividade, convertémonos por un intre en protagonistas das historias, dando vida aos libros dun xeito orixinal e moi participativo.

Por suposto, tamén tivemos tempo para merendar, conversar, xogar e gozar xuntos desta última xuntanza. Para rematar, recibimos un agasallo moi fresquiño, perfecto para poñer o broche final a unha tarde chea de lecturas, amizade e convivencia.

Dende BiblioPepiño queremos agradecer a participación de todo o alumnado que formou parte de Pepilecturas ao longo deste curso. Grazas por compartir historias, opinións, ilusións e momentos tan especiais arredor dos libros.

Porque ler xuntos sempre é unha aventura! 

PICNIC LITERARIO PARA DESPEDIR PEPILECTURAS

 En BiblioPepiño queremos pechar este curso de Pepilecturas, o noso club de lectura do alumnado, dun xeito moi especial… ¡cunha tarde de convivencia ao aire libre! 

Para celebrar a nosa última xuntanza do curso, trasladaremos os libros, as conversas e as risas ao fermoso Parque de Pías, onde gozaremos dunha tarde de picnic literario.

Será un momento para compartir un rato agradable, lembrar as lecturas que nos acompañaron ao longo do curso, falar dos nosos libros favoritos, xogar, conversar e, sobre todo, despedir esta actividade que tantos bos momentos nos deixou. 

Porque en Pepilecturas non só compartimos historias… tamén construímos amizades, descubrimos novos mundos e aprendemos a mirar os libros con outros ollos.

Animámosvos a traer moitas ganas de pasar unha tarde especial entre compañeiros e lecturas.

Un fermoso xeito de poñer o broche final a un curso cheo de páxinas, aventuras e emocións!

Vémonos no picnic de Pepilecturas! 

retARTE final

En BiblioPepiño queremos compartir convosco a solución do noso último RetArte. Esperamos que vos gustase investigar, observar e poñer a proba os vosos coñecementos artísticos para descubrir a resposta correcta.

Antes de nada, queremos facer un enorme agradecemento a todo o alumnado e ás familias participantes, porque cada semana sorpréndenos a vosa implicación, curiosidade e ganas de aprender a través da arte. Grazas por dedicar un anaquiño do voso tempo a participar nesta aventura artística!

A resposta correcta era: 

Coñecer a arte é moito máis que saber o nome dun cadro ou dun artista. A arte axúdanos a observar mellor o mundo, expresar emocións, descubrir outras formas de pensar e comprender a nosa historia e cultura. Cada reto é unha oportunidade para aprender algo novo, mirar con máis atención e converterse nun auténtico detective da arte.

Grazas por facer medrar esta comunidade artística de BiblioPepiño. Seguimos pintando, creando e aprendendo xuntos!

OBRADOIRO DE ACUARELA

No marco do noso programa Lectura e Familias e do proxecto de centro Pinceladas na Sangriña, vivimos unha tarde moi especial, BiblioPepiño  convertertiuse nun auténtico espazo de creación, encontro e inspiración artística.

Da man da artista Gemma Marqués, alumnado e familias compartiron un fermoso obradoiro artístico no que a creatividade, a expresión plástica e a imaxinación foron as grandes protagonistas. Ao longo da sesión, tivemos a oportunidade de experimentar coa acuarela, descubrindo que a arte tamén é unha forma de comunicarnos, emocionarnos e aprender xuntos.

Este encontro permitiunos seguir tecendo lazos entre escola e familias, facendo da lectura, da arte e da cultura un espazo compartido de convivencia e participación. Ademais, esta actividade conecta plenamente co noso PDI Pinceladas na Sangriña, co que continuamos achegando ao alumnado diferentes linguaxes artísticas e persoas creadoras que enriquecen a nosa mirada sobre o mundo.

Queremos agradecer especialmente a Gemma Marqués pola súa cercanía, implicación e por guiarnos nesta experiencia tan inspiradora, así como ás familias participantes por acompañarnos unha vez máis nas propostas de BiblioPepiño.

Deixámosvos algunhas imaxes desta tarde tan especial... porque crear en familia sempre deixa pegada!

DÍA DOS MUSEOS

Esta semana está sendo moi especial no cole. 

Estamos cheos de actividades pero queremos destacar o DÍA DOS MUSEOS. Queremos incidir nesta conmemoración porque, como sabedes, levamos todo o ano traballando arreo, aprendendo moitas cousas de diferentes artistas e hoxe todo o esforzo culminou con pequenas presentacións do alumnado de todas as aulas expoñendo o seu traballo de investigación aos diferentes cursos.

Durante toda a mañá en diferentes quendas, o alumnado distribuiuse polas aulas para falar sobre o seu artista.

Finalmente agasallaron a cada aula cun tríptico, para poder recordar de novo todo o comentado.

Ao rematar a xornada o alumnado axudante de biblio repartiu entre as familias trípticos informativos sobre: Paul Klee, Kandinsky, Dalí, Yayoi Kusama....

Temos un cole con moita arte!

OBRADOIRO EN FAMILIA: BOTÁNICA EN ACUARELA

Dende BiblioPepiño, dentro do programa Lectura e Familias, abrimos as inscricións para un  obradoiro dirixido ás familias e ao alumnado de 5º e 6º de Educación Primaria, unha proposta moi especial na que arte, creatividade e aprendizaxe irán da man.

Nesta ocasión teremos a sorte de contar coa participación de Gemma Marqués, artista plástica, docente e xestora cultural vinculada ao mundo da arte e da educación. 

Licenciada en Belas Artes, desenvolve o seu traballo artístico en La Casa Taller, un espazo creativo situado na Guarda, onde combina a creación artística coa formación de persoas de todas as idades. A súa obra abrangue diferentes disciplinas como a pintura, o retrato, os murais e a acuarela, sempre cunha mirada moi sensible cara á expresión artística e á creatividade.

Ademais da súa traxectoria como artista, Gemma destaca polo seu labor divulgador e educativo, organizando cursos, obradoiros e experiencias creativas que achegan a arte dunha maneira vivencial e inspiradora ao público infantil e adulto.

Será unha magnífica oportunidade para crear, experimentar e gozar da arte da man dunha profesional, nun ambiente creativo e participativo.

As prazas son limitadas, polo que animamos ás familias interesadas a formalizar a inscrición canto antes, no seguinte enlace:

Agardámosvos para compartir unha tarde chea de cor, imaxinación e arte! 

NOVIDADES PARA FAMILIAS

En BiblioPepiño seguimos apostando por acompañar ás familias no apaixonante reto de educar. Por iso, o noso Recuncho de Familias énchese de novas lecturas pensadas para ofrecer orientación, reflexións e recursos prácticos sobre temas que nos preocupan e ocupan no día a día.

Nesta ocasión incorporamos títulos centrados en cuestións tan actuais como a educación sen pantallas, o impacto das redes sociais e da tecnoloxía na infancia, a importancia da lectura e da educación emocional, así como libros relacionados coas necesidades educativas especiais, o autismo, o TDAH ou a atención á diversidade.

Sabemos que educar non vén con manual de instrucións, pero ás veces unha boa lectura pode abrir novas perspectivas, resolver dúbidas ou simplemente facernos sentir acompañados no camiño. Por iso, animámosvos a botarlle un ollo ás novidades e escoller aquel libro que máis se adapte ás vosas inquietudes ou intereses.

Lembrade que todos estes libros están dispoñibles en préstamo para as familias do centro. Só tedes que achegarvos á biblioteca e levar para casa aquela lectura que vos apeteza descubrir.

Porque educar tamén é aprender… e en BiblioPepiño seguimos medrando xuntos, familia e escola da man.

AS FAMILIAS CONTAN ... E ENCANTAN

En BiblioPepiño sabemos que o amor pola lectura medra moito máis cando se comparte. Por iso, con motivo da celebración do Día do Libro, puxemos en marcha unha actividade moi especial dentro do programa Lectura e Familias: un fermoso encontro entre fogar e escola a través dos contos.

Moitas familias do noso alumnado quixeron sumarse a esta iniciativa compartindo lecturas, contando contos e gozando da maxia das historias en familia. Grazas á vosa participación, puidemos crear un vídeo recopilatorio cheo de palabras, sorrisos e momentos lectores, que amosa como a lectura tamén une, emociona e crea recordos inesquecibles.

Cada fotografía é unha pequena mostra do importante papel que teñen as familias no desenvolvemento do gusto pola lectura e no acompañamento lector dos nenos e nenas. Porque ler xuntos é compartir tempo, emocións, aprendizaxes… e tamén moito cariño.

Dende BiblioPepiño queremos agradecer de corazón a implicación de todas as familias participantes. Sen vós, actividades coma esta non terían o mesmo significado.

Convidámosvos agora a desfrutar do vídeo recopilatorio, unha pequena homenaxe ao poder das historias compartidas e ao compromiso das nosas familias coa lectura.

Porque en BiblioPepiño… ler en familia sempre suma! 

DÍA ESCOLAR DAS MATEMÁTICAS

Hoxe conmemoramos o Día Escolar das Matemáticas, unha ocasión perfecta para lembrar que as matemáticas están presentes en moitos momentos do noso día a día… ¡e tamén nos xogos!

Dende BiblioPepiño queremos poñer en valor a importancia de aprender manipulando, experimentando e divertíndonos. Os xogos de mesa convértense nun recurso fantástico para desenvolver habilidades lóxico-matemáticas de maneira natural e motivadora. A través deles traballamos a atención, a estratexia, o cálculo mental, a orientación espacial, a resolución de problemas ou a planificación, entre outras moitas destrezas.

Para celebrar este día especial, preparamos unha pequena selección de xogos cos que o alumnado pode aprender matemáticas mentres xoga e comparte momentos cos compañeiros e compañeiras.

Os xogos de mesa axudan a converter as matemáticas nunha experiencia divertida e significativa. Cando o alumnado xoga: experimenta sen medo ao erro, busca solucións, crea estratexias, coopera cos demais e desenvolve o pensamento crítico.

Porque aprender matemáticas tamén pode ser emocionante…
e en BiblioPepiño sabemos que os xogos son unha gran porta para descubrir todo o que as matemáticas nos poden ofrecer.

¡Animádevos a xogar e a aprender con nós!

LETRAS GALEGAS 2026, HOMENAXE A BEGOÑA CAAMAÑO

 Este ano, o Día das Letras Galegas está adicado á escritora e xornalista Begoña Caamaño, unha figura fundamental da literatura galega contemporánea e unha voz comprometida coa lingua, a igualdade e a cultura do noso país.

Dende "Pepiño nas Ondas" quixemos sumarnos a esta celebración realizando dous podcast moi especiais elaborados polo noso alumnado:

O alumnado de 6º de Primaria preparou unha divertida e interesante entrevista ficticia á homenaxeada, na que poderemos coñecer mellor a súa vida, o seu pensamento e a súa obra.

Pola súa parte, o alumnado de 3º de Primaria realizou un podcast sobre a vida de Begoña Caamaño, achegándonos á súa traxectoria dunha maneira amena e moi especial.

Agardamos que vos gusten moito e que desfrutedes descubrindo a figura dunha autora imprescindible das nosas letras.

Feliz Día das nosas Letras Galegas!

retARTE reto 9

 Na nosa aventura artística de retArte, seguimos descubrindo que a creatividade non ten límites. Nesta ocasión queremos compartir convosco a resolución do Reto 8

E agora preparade as vosas capacidades de investigación porque xa está aquí o novo reto de retArte.

Animádevos a participar no Reto 9 de retArte!

CONSTELACIÓN DE PEPILECTURAS ADULTOS

Durante este curso realizamos unha viaxe compartida na que fomos tecendo a nosa constelación entre libros, voces, emocións e reflexións. Durante estes meses, a lectura converteuse nun espazo de encontro e diálogo, nun lugar onde cada obra abriu novas preguntas e cada conversa deixou pegadas persoais e colectivas.

As lecturas escollidas conformaron unha auténtica constelación: textos diversos unidos por fíos invisibles que nos levaron a explorar a memoria, a identidade, os afectos, os conflitos sociais e as múltiples maneiras de habitar o mundo. Como estrelas que brillan con luz propia, cada libro achegou unha mirada singular; xuntas, esas luces debuxaron un mapa compartido de experiencias lectoras.

Pepilecturas consolidouse, unha vez máis, como un espazo de comunidade cultural, de pensamento crítico e tamén de pracer lector. Nesta constelación quedan recollidos os ecos dese camiño: recomendacións, impresións, conexións e emocións nacidas arredor da lectura compartida.

Que estas páxinas sirvan non só como memoria deste curso, senón tamén como invitación a seguir lendo, conversando e descubrindo novos universos literarios.

Animádevos a participar!

SE O NOSO PEPIÑO FOSE DESEÑADO POR...

 Algunha vez vos preguntáchedes como sería Pepiño se fose deseñado por algún dos nosos artistas?

Pois ben, o alumnado dende tres anos ata sexto de educación primaria fixo a súa interpretación de como sería se fose deseñado polos seus artistas de aula, e aquí tedes o resultado.

Claro que para acadar estes resultados tivemos que investigar e analizar diversas obras dos artistas, para elexir os aspectos máis desatacados das súas obras.

Cal credes que é o mais fiel ao seu estilo?

retARTE reto 8

Ola, xente creativa!

Dende BiblioPepiño queremos seguir enchendo este espazo de imaxinación, enxeño e ganas de participar. 

A semana pasada propoñíamosvos un pequeno desafío que puxo a proba a vosa capacidade de observación e interpretación. Moitos de vós achegástesvos á solución, pero aquí vai a resposta completa:

Parabéns a todas as persoas que participastes!

Xa imos polo Reto 8 de RetArte, e non podemos estar máis contentos coa acollida que está tendo esta iniciativa. Así que… se aínda non te animaches, este é o momento perfecto!

O Reto 8 xa está en marcha e agarda por ti. 

 Podes facelo só/a, en grupo, con familia ou amizades… o importante é gozar do proceso!

Anímate a participar no novo reto!

 

DÍA DO LIBRO

 Mañá celebramos o Día do Libro en Bibliopepiño dunha maneira moi especial!

Temos preparada unha actividade chea de misterio e diversión: libros sorpresa en préstamo. Todos eles estarán empaquetados, polo que non poderás ver a portada nin o título… só atoparás unha pequena pista sobre o seu contido. Unha invitación perfecta para deixarte levar pola curiosidade e descubrir novas historias!

Para facilitar a elección:

• Os libros cunha pegatina en forma de estrela están pensados para os máis pequenos do cole.
• Os libros cunha cariña sorrinte son ideais para lectores máis maiores.

Atréveste a levar un libro sen saber cal é? Pode ser o comezo dunha nova historia favorita!

Agardámoste mañá en Bibliopepiño para celebrar xuntos o pracer da lectura.

retARTE reto 7

Expoñemos un novo reto para esta semana, pero antes resolvemos o adiviñArtista da semana pasada, cantos de vós adivicháchedes de quen se trataba?

Continuamos:

Xa sabedes, investigade e deixade as vosas respostas na caixa de retARTE que temos en BiblioPepiño!!!